રોજ અહીં એવી રીતે આ ચાક ઉપર ચડવાનું
મારું સરનામું પણ મારે, રોજ મને પૂછવાનું !

સૂરજ સાખે અંગ મરોડે પ્રશ્નો તાજા-માજા
ઉત્તર અડકો-દડકો રમવા થઈ ગ્યા આઘા-પાછા

મેઘધનુષી મ્હોરાં પ્હેરી દર્પણને છળવાનું
રોજ અહીં એવી રીતે આ ચાક ઉપર ચડવાનું !

તર્ક અને તથ્યોના પગલે, ચાલ સમયની નાંણી
ઓટ અને ભરતીની રંગત સમભાવે મેં માંણી

વાતથી પહેલાં મૌનનું અહિંયા પોત ઝીણું વણવાનું
રોજ અહીં એવી રીતે આ ચાક ઉપર ચડવાનું !

ખાલીપો ખખડે નહિં એથી, શબ્દોને મેં સાધ્યા
એમ કરીને એકલતાના પાસા અવળા પાડ્યા

કાલના વરતારાથી આજે, આગળ છે વધવાનું.
રોજ અહીં એવી રીતે આ ચાક ઉપર ચડવાનું !

~ લક્ષ્મી ડોબરિયા