માવતરનાં ભાગ્યમાં હવે ફાધર્સ કે મધર્સ ‘ડે’ છે

છોડવાનું વિચારનારા તો કદી ક્યાં કંઈ છોડે છે
છોડી દેનારાં સમજે છે કે આ તન પણ ભાડે છે

પીરસનારાં જ બેસી ગયા છે પંગતમાં હવે
જોડનારાં જ બહુધા બધેબધું તોડે છે

સફળતાનાં તો એક હજાર બાપ હોય છે
નિષ્ફળતામાં જ તો સૌ પ્રણેતાને વખોડે છે

ભીનાશ જોઈએ છે જેને તે તો બને છે મરજીવા
લવારીવીરો બેઠાંબેઠાં ઝાકળનાં પરપોટાં ફોડે છે

રામાયણની એ જ તો છે ને રામાયણ કળિયુગમાં
જટાયુ,વિભીષણ,ખિસકોલી ના રાવણને કનડે છે

સમય માટે માંગવી પડે અપોઈન્ટમેન્ટ સંતાનોની
માવતરનાં ભાગ્યમાં હવે ફાધર્સ કે મધર્સ ‘ડે’ છે

– મિત્તલ ખેતાણી