મનને થોડું ઉદાસ રાખું છું.
એમ એની તપાસ રાખું છું.

કોઈ ભીતરેથી માર્ગ ચીંધે છે,
હું મને આસપાસ રાખું છું.

વાર-તહેવારે કોરા કાગળ પર,
ખુદ્દને મળવાનું ખાસ રાખું છું.

એટલે તો છે લાગણી ઘેરી,
મૂળસોતી હું પ્યાસ રાખું છું.

કૈં વધારે તો ક્યાં કશું રાખ્યું ?
એના નામે આ શ્વાસ રાખું છું.

મહિમા હું આપવાનો જાણું છું,
એટલે ક્યાં કચાસ રાખું છું ?

આથમે નહિં એ સૂર્યની માફક,
હું ગઝલનો ઉજાસ રાખું છું.

~ લક્ષ્મી ડોબરિયા