લખતી રહું ઘીમી ઝરેલી ઓસમાં નામ તારું
મોતી બની પાનાં ઉપર તું ચમક થઇ આવજે ને
સઘળી સુકાયેલી ક્ષણો તું આંખમાં લાવજે રે

લખતી રહું ફૂલો વડે ઉપવન મહી નામ તારું
સ્નેહે તુ મારા પ્રેમની એ ભેટ લઇ આવજે ને
ખૂશ્બુ ભર્યો સંગાથ તારો સામે થી આપજે રે

લખતી રહું ક્ષિતીજની રેખા ઉપર નામ તારું
સંધ્યા સજાવે સેજ ગુલાબી અહી આવજે ને
નભને ઘરા જેવા મિલનનો ખ્યાલ તું રાખજે રે

લખતી રહું ધડકનને શ્વાસોમાં ભરી નામ તારું
મારી નશોમાં તું નશાને સાથ લઇ આવજે ને
પ્યાલી ભરીને પ્રીતની ઉર્મીના મય ચાખજે રે

લખતી રહું કાવ્યો ગઝલમાં માત્ર હું નામ તારું
સાથે સજાવીશું વફાને વાયદા આવજે ને
બે ટુંક તારી આપજે બાકી મને વાંચજે રે

~ રેખા પટેલ ‘વિનોદિની’
ગાગાલગા-ગાગાલગા-ગાગાલગા-ગાલગાગા