ક્યાંક હળવી ક્યાંક ભારી હોય છે !
ક્ષણ બધે ક્યાં એકધારી હોય છે ?

ના કદી અણસાર આપે વાર નો,
આ સમય પાકો શિકારી હોય છે !

એ હકીકત સ્વપ્ન જેવી લાગશે,
ધારણાં માં જેને ધારી હોય છે !

જ્યાં નદી દરિયા ને મળતી પ્રેમ થી,
ત્યાં થી બસ, એ સાવ ખારી હોય છે !

પાનખર વરસોવરસ પોંખ્યા કરે,
ડાળ માં એવી ખુમારી હોય છે !

છે મગજ આખું અને મન થોડું, પણ. .
પ્રેમ માં બન્ને જુગારી હોય છે !

હોય છે ક્યારેક પીડા માં કરાર,
ને, ખુશી માં બે-કરારી હોય છે !

~ લક્ષ્મી ડોબરિયા