ખાલીપો ખાળવાના નુસખામાં,
જે ભર્યું, તે મળ્યું છે પડઘામાં !

થઈ ગયું શું આ જોતજોતામાં ?
તું જ દેખાય છે અરીસામાં !

મેં સમય સાચવ્યો સહજતાથી,
ક્યાંક મુઠ્ઠીમાં, ક્યાંક ખોબામાં !

તું કસોટી કરે છે તો જાણ્યું,
તેંય શ્રધ્ધા તો રાખી મારામાં !

તારા હોવાની થઈ છે અવગણના,
ઓ ઉદાસી, સમજ ઈશારામાં !

એમ મ્હોરી ઉઠું છું, તમને જોઈ,
જાણે કે ગુલમહોર તડકામાં !

સાવ એળે ન જાય ઝૂરાપો,
આ ગઝલ આવે છે દિલાસામાં !

~ લક્ષ્મી ડોબરિયા