જીવવાનું કોઈ તો કારણ જોઈએ
બારેમાસ તરસતો શ્રાવણ જોઈએ

સાવ હળવા તો ઉડી જાય આકાશે
કીડી પર કોશનું ભારણ જોઈએ

શિવાજી ના હોય પારણે પારણે
માતા જીજાબાઈનાં ધાવણ જોઈએ

નહીં તો ભગવાન જ થઈ જાય સૌ
માનવ ને માયાની મથામણ જોઈએ

ના લાગે નગ્નતા કદી આટલી મનોહર
શરીરને આકર્ષાવા આવરણ જોઈએ

લક્ષ્મણ મૂર્છાએ હનુમાનને જગાડવાં
શક્તિભાન કરાવતાં ચારણ જોઈએ

રામ પણ ક્યાં સેતુબંધ સર્જી શકત
પથરા પર લખનારા વાનર જોઈએ

રામ ને ય ખાવાં દોડીને આવવું પડે
બોરમાં શબરીનું મેળવણ જોઈએ

ભગવાને ય તોડવું પડે વચન ખુદનું
ભક્ત ભીષ્મનું સામે પ્રણ જોઈએ

~ મિત્તલ ખેતાણી