ફરતા’તા હાથમાં લઈ હાથ તને યાદ છે?.
આપણો એ જૂનો સંગાથ તને યાદ છે?.

આંખોમાં ઓરતાઓ શમણા થઇ સ્ફુરતા,
મીઠા સહવાસ માટે કેટલુંય ઝુરતા,
સપનામાં ભીડેલી બાથ તને યાદ છે?.
આપણો એ જૂનો સંગાથ તને યાદ છે?.

સાત સાત જન્મોના કોલ દીધા આપણે,
સંગ સંગ જીવવાના સમ લીધા આપણે ,
મનથી મેં માન્યો’તો નાથ તને યાદ છે?.
આપણો એ જૂનો સંગાથ તને યાદ છે?.

ભીના સંકેલ્યા’તા લાગણીના ખેલને ,
પળમાં વિખેર્યા’તા સપનાના મ્હેલને,
સંમતિથી છોડયો’તો સાથ તને યાદ છે?.
આપણો એ જૂનો સંગાથ તને યાદ છે?.

– અંજના ગોસ્વામી ‘અંજુમ આનંદ’