ભૂલવું જો સહેલું હોય તો જીવન કેટલું સહેલું હોય?
છૂટી ગયો જે સાથ એની પાછળ ના હૈયું ઘેલું હોય.

કોણ આવીને ક્યારે ગયું, એ સરવાળા નકામાં હોય,
કેમ કોઈ વસી ગયું એનું કારણ જાણવું પહેલું હોય.

સઘળું ઈચ્છાઓ કરવાથી એમ કંઈ મળવાનું નથી,
જો ગમતું મળી આવે જીવન ખુશીઓથી લીલું હોય.

ભૂલી જવું ભૂતકાળને, આજ ડહાપણ સાચવી લેશે,
તકદીરમાં લખાયું હોત, ચોક્કસ આવ્યું વહેલું હોય.

છીનવી લેવો નહિ, કોઈનો આનંદ કદી ચોરીછૂપી
ઉછીની ખુશીઓથી ઉજળા કપડે જીવતર મેલું હોય.

~ રેખા પટેલ ‘વિનોદિની’