એક બાજુ ચીસ છે

એક બાજુ ચીસ છે ને એક બાજુ વાંસળી છે;
એ જ મારો વાંક કે મેં બેઉ ચીજો સાંભળી છે.

તું નહીં જોઈ શકે – જાણી શકે મારા વિચારો,
મારી ઇચ્છાઓ હવા કરતાં ય ખૂબ જ પાતળી છે.
ચાલુ યુદ્ધે રથનું પૈડું ઠીક કરવા ઊતર્યો છું,
ને સ્વજન સામે તરફ છે એ ઘણો બાણાવળી છે.

વિશ્વનો વૈભવ છે તારા હાથ પર એ વાત સાચી,
કિન્તુ મારા હાથ પર તો માત્ર મારી આંગળી છે.

બેઉને હોવાપણું પેટાવવાની તક મળી છે,
મારી પાસે ટાઢ છે ને તારી પાસે કામળી છે.

– અનિલ ચાવડા