આ ભાવ ને અભાવ છે એ લાજવાબ છે.
ઔષધ સમા આ સ્ત્રાવ છે એ લાજવાબ છે.

આગળ જવાના ખાસ એ પગલાં ભરે નહીં,
જળનો સહજ સ્વભાવ છે એ લાજવાબ છે.

મારી નજર છે આજ ઉપર, વાત સાચી પણ,
ગઇકાલનો પ્રભાવ છે એ લાજવાબ છે.

ગમતું થતું નથી.. ની છે ફરિયાદ તે છતાં,
એકાદ-બે બનાવ છે એ લાજવાબ છે.

હળવા થવાની વાતમાં બીજું કશું નથી,
લીધા-દીધાનો લ્હાવ છે એ લાજવાબ છે.

મારી જ સામે રોજ હું ખટલો ચલાવું છું,
મારો મને લગાવ છે એ લાજવાબ છે.

ઉપર જવાની હોડમાં નમતું ય જોખી લઉં,
આ દાબ ને દબાવ છે એ લાજવાબ છે.

~ લક્ષ્મી ડોબરિયા