Gazal Gujarati

દુનિયા આખીને જે નચાવે છે

ગાગાગાગા-ગાગાલગા-ગાગાગાગા-ગાગાગા-ગાગાગાગા-ગાગા

દુનિયા આખીને જે નચાવે છે એ કાનો મારી આગળ-પાછળ નાચે છે
આખી દુનિયા સર જ્યા ઝુકાવે છે એ કાનો મારી આગળ-પાછળ નાચે છે

મારીને કંકર ભીજવે મારી કોરી નવરંગી ચુનરી ,છે નખરાળો
મારા ગુસ્સાને જે પચાવે છે એ કાનો મારી આગળ-પાછળ નાચે છે

વરણાગી વેડાઓ બધા એના બહુ પ્યારા એવા ,જે ઘેલી કરતા મુજને
રૂઠેલી જાણીને મનાવે છે એ કાનો મારી આગળ-પાછળ નાચે છે

ગોપી સંગે એ રાસડા લેતો ,પુનમી રાતોમાં કાનો કામણ ભરતો
અંબોડો મુજનો જે સજાવે છે એ કાનો મારી આગળ-પાછળ નાચે છે

બંસીંના નાદે એ કરે છે ઘેલી વૃંદાવનની ગોપી જોડે રાધાને
કામણ કરતો મુજને હસાવે છે એ કાનો મારી આગળ-પાછળ નાચે છે

ઉચકે છે ટચલી આંગળીએ ગોવરઘન જે મુજને કાલાવાલા કરતો
સપનામા આવીને સતાવે છે એ કાનો મારી આગળ-પાછળ નાચે છે

કેવા એ નોખા રૂપ ઘરતો નોખા નામે પૂજાતો જઇ જગ આખામાં
“વ્હાલી રાધે” બોલી પટાવે છે એ કાનો મારી આગળ-પાછળ નાચે છે

~ રેખા પટેલ ‘વિનોદિની’

Leave a Reply

This site uses Akismet to reduce spam. Learn how your comment data is processed.