દેશ દેશ ખાલી શું કરો છો, તમારો દ્વેષ ઉતારોને
દેશ આગળ લઈ જવાં,સૌને ભાઈ-બહેન માનોને

370 370 શું કરો છો,કાશ્મીર તો ભળી ગ્યું હાલો
મા ને રાજી કરવાં , નાત-ધર્મ-પ્રાંત-પક્ષ ફગાવોને

વિશ્વગુરુ માત્ર સ્વપ્નવાથી થવાશે શું વિશ્વગુરુ?
ચા વેચતાં ઓલાં છોટુને, તમેય થોડું ભણાવોને

ગંદકી ગંદકી શું કરો છો,એમ થાશે ભારત સ્વચ્છ?
તમારા મન અંદરની ગંદકીને , તમેય ઝાડું મારોને

સરકાર કરે સરકાર કરે, અસરકારક બોલ્યાં કરો
દેશ સોના નગરી બનાવવાં , તમે ય કામ આવોને

ભ્રષ્ટાચાર-કામચોરી કરવાંથી સુધરશે શું સ્થિતિ?
હું સુધરીશ દેશ સુધરશે, દાખલો બની બતાવોને

ગૌહત્યા અટકાવવાં ઘરેઘરે તમેય ગાય વસાવોને
રામમંદિર બને એ સાથેસાથે,હૈયે ય રામ વસાવોને

મારે શું?,મારું શું?,હુ શું કરી શકું? એ વિચાર્યા કર્યું
યથા પ્રજા તથા રાજા,તમે નાગરિક ધર્મ નિભાવોને

ડાહી ડાહી ફિશિયારી તો બહુ કરી દેશભક્તિની
મોબાઈલ ફોરવર્ડથી વધુ,અમલમાં મૂકી બતાવોને

ઉપાડનારાં ઉપાડશે ગોવર્ધન, બંધાશે સેતુબંધ પણ
ગોવાળ-ખિસકોલી બની, તમારું કર્મ ય દિપાવોને

~ મિત્તલ ખેતાણી