કાલે તમામ શહેરની આંખોમાં આવશું,
વાંચી શકાય એ રીતે રાહોમાં આવશું.

કોઈ કદાચ ગામનું બદલાઈ જાય નામ,
પાદરના પાટિયાના લખાણોમાં આવશું.

પીઠા તો બંધ થઈ ગયા , તોપણ નશા તો છે,
એવી અનેક કૈફી શરાબોમાં આવશું.

એકેક તબીબ રોગથી લાચાર ,એટલે,
ટીવી ઉપર’ દિમાગી ‘ દવાઓમાં આવશું.

ચારે તરફ ઉગેલા હશે કંટકો છતાં,
એવી દશામાં થઈ ને ગુલાબોમાં આવશું.

અમને ઝવેરી જેમ કદી સાચવીને રાખ,
નહિંતર સદી સદીની ખતાઓમાં આવશું.

એવૉર્ડમાં ન જોખ અમારી ગઝલને તું,
દિલની કિતાબના અમે પાઠોમાં આવશું.

~ સિદ્દીક ભરૂચી