સિંહોનાં માથા પર કદી પણ તાજ નથી હોતાં

જે છે અસલ ને એનાં કોઈ અંદાજ નથી હોતાં
સાચાં ફુલો અત્તરનાં કદી મોહતાજ નથી હોતાં

એ બેસે જયાં ત્યાં જ બની જાય છે સિંહાસન
સિંહોનાં માથા પર કદી પણ તાજ નથી હોતાં

ગીધ અને અન્ય પ્રજાતિ દેખાવે તો લાગે સરખી
પણ,અન્યનો શિકાર જમે એ બાજ નથી હોતાં

નથી કરતાં જે અત્યારે એ પછી ય શું કરવાનાં!
આળસનાં ભાગ્યમાં કાલ કે આજ નથી હોતાં

જો ધારે ને એ તો પોઢાવી શકે પરમેશ્વરને પણ
હાલરડાંમાં ભલે કોઈ સંગીત,સાજ નથી હોતાં

– મિત્તલ ખેતાણી
(મિત્તલ ખેતાણી નાં કાવ્ય સંગ્રહ ‘स्वान्तः सुखाय’માં)