વાત કરવાનું ય કોઈક ઠેકાણું જોઈએ

એવું નથી કે મારે માત્ર નાણું જોઈએ
વાત કરવાનું ય કોઈક ઠેકાણું જોઈએ

ખાવાં કરતાંય ખવડાવવું વધુ ગમવાં લાગે
તાંદુલ,ભાજી, બોરનું જ ભાણું જોઈએ

જબાનને સાચવી શકું જાન જોખમે પણ
ટાણું સચવાયને બસ એવું ટાણું જોઈએ

જ્ઞાન માર્ગ થકી કદાચ મળતું હશે પ્રભુત્વ
ભક્તિમાર્ગથી પ્રભુ એ ય પરબારું જોઈએ

છપ્પન ભોગ પણ ટૂંકા પડે છે તન ને મનને
આત્માને સત્ય,પ્રેમ,કરુણાનું વાળું જોઈએ

દેવ-દાનવ વચ્ચે માનવ છું,છું અડધો દાનવ
મારી કુવૃતિને સંસ્કારનું ગુરુ તાળું જોઈએ

– મિત્તલ ખેતાણી
(મિત્તલ ખેતાણી નાં કાવ્ય સંગ્રહ ‘स्वान्तः सुखाय’માં)