આયાચક હોય ને તે જ તો માંગી શકે છે

આંખો બંધ કરે ને તે જ તો જાગી શકે છે
આયાચક હોય ને તે જ તો માંગી શકે છે

ત્યાગ વૃત્તિનો હોય વસ્તુ, વ્યક્તિનો નહીં
જાતથી જાત તો કદી ક્યાં ભાગી શકે છે

દુઆ,હાય જ પલટાવી શકે છે પ્રારબ્ધને
જેને તાગવું નથી કંઇ એ જ તાગી શકે છે

જોડાયો જે અસ્તિત્વમાં જાતને ભાંગીને
હૈયું પછી ક્યાં એ કોઈનુંય ભાંગી શકે છે

નહીં કહે કોઈને એમ માની કહી દેતાં નહીં
સ્વજન વિભીષણ જ સદા ખાનગી બકે છે

– મિત્તલ ખેતાણી
(મિત્તલ ખેતાણી નાં કાવ્ય સંગ્રહ ‘स्वान्तः सुखाय’માં)