ભક્ત પાસે તો ખુદ ભગવાનને પણ ગરજાવાનું હોય છે

જે ન સમજે તેને જ તો દુનિયામાં સમજાવાનું હોય છે
અમર થવું છે ને? તો જીવતાં જીવ મરી જવાનું હોય છે

બાણશૈય્યાથી તો સારી પ્રતિજ્ઞા તોડીને મળતી વેણશૈયા
શિખંડીઓનાં આ યુગમાં ભીષ્મને સંતાવાંનું હોય છે

સત્કર્મનું તોફાન પેદા કરી દયો ને,શોધશે તમને ધર્મપતિ
ભક્ત પાસે તો ખુદ ભગવાનને પણ ગરજાવાનું હોય છે

નાકવાળી શુપર્ણખાઓ જ પ્રસરી છે લગભગ જબાનોમાં
શરમ હોય ને જેને તેને જ તો શરમાઇને મરવાનું હોય છે

કાંટાઓ તો કરી જ લ્યે છેને પોતપોતાનો રસ્તો દમદાટીથી
સુગંધ અને પુષ્પનાં નસીબમાં જ તો કરમાવાનું હોય છે

-મિત્તલ ખેતાણી