હા જી, જેની પર થયો’તો રેપ, એ આ બાઈ છે!
શું કહ્યું સર, નામ? એનું નામ ભલમનસાઈ છે!

કોર્ટના દરવાજે છે લાચારીઓ લોહીલુહાણ,
બાપડી એ ન્યાયના રસ્તે ઘણી ઢસડાઈ છે.

બાગનું જોતો‘તો સપનું છોડ ઉકરડાનો જે,
એની ઉપર ચકચકિત કુહાડીઓ ઝીંકાઈ છે.

સૂર ચૂક્યો જો ગવૈયો, પંડિતે ઊધડો લીધો,
પણ સભામાં ભૂપતિની છીંક બહુ વખણાઈ છે!

જે ઘરે બસ એક રકાબી ચાના પણ સાંસા હતા,
એ ઘરે ઊડતી રકાબી આવીને ટકરાઈ છે.

ખૂન સપનાનું કરે જે એ ય તાલિબાન છે,
સાવ સહેલી વાત પણ ક્યાં કોઈને સમજાઈ છે!

~ અનિલ ચાવડા