હોઈએ એવું ક્યાં હોવું હોય છે

હોઈએ એવું ક્યાં હોવું હોય છે?
નામનું બસ એક છોગું હોય છે.

કેમ એને પારખી શકશો તમે?
મન ઉપર પણ ક્યાંક મ્હોરું હોય છે.

કોણ જાણે કેમ ઘા ખમતું હશે,
આ હૃદય તો પાણીપોચું હોય છે.

લહેરખીએ લટ રમાડીને કહ્યું,
મ્હેકવું પણ નામજોગું હોય છે.

તળ-સપાટીએ ઘણું ઘોળ્યા કરે,
આ સમય જાણે વલોણું હોય છે.

જિંદગી, હું સ્થિર કઇ રીતે રહું?
વ્હેણ તારું વત્તું-ઓછું હોય છે.

હોય શું આ શબ્દમાં કે મૌનમાં?
એક,બે ઘટનાનું ઓઠું હોય છે.

~ લક્ષ્મી ડોબરિયા