એક અનુભવ તાજો છે, એ નાની સૂની વાત નથી.
જીવનનો એ હિસ્સો છે, એ નાની સૂની વાત નથી.

સ્થિર થવું ને આગળ વધવું, વાત જરા વસમી છે કિન્તુ,
હાથ સમયનો ઝાલ્યો છે, એ નાની સૂની વાત નથી.

ઘેરાં, ઘાટાં અંધારાંની વચ્ચે ધરપત રાખ જરા,
મારગ ચીંધતા પ્રશ્નો છે, એ નાની સૂની વાત નથી.

ખિસ્સું ખાલી હોય કદીક ને હોય હથેળી સૂની ત્યારે,
હૈયામાં ઉમળકો છે, એ નાની સૂની વાત નથી.

ખળખળતાં, ઝળહળતાં ઝરણાં એક જ સૂરમાં બોલ્યાં કે,
વાંકો ચૂકો રસ્તો છે, એ નાની સૂની વાત નથી.

વિરોધી મત હોય જરૂરી એ વાતે તો સહમત થા,
પોતીકો એક દીવો છે, એ નાની સૂની વાત નથી.

તાસીર જુદી મારી છે ને છાપ અલગ મેં છોડી છે,
ખાલીપો અજવાળ્યો છે, એ નાની સૂની વાત નથી.

– લક્ષ્મી ડોબરિયા

શબ્દસર જૂન ૨૦૨૩ના અંકમાં પ્રકાશિત ગઝલ. 💐💐