“અટલ સવેરા” માં પ્રકાશિત ગઝલ.

અરીસો પ્રશ્ન પૂછે, એ દશા છે માતબર.
અનુભવ રોજના છે, તે છતાં છે માતબર.

તમે તમને જડો એવા ખૂણા છે માતબર.
ઘણી ઘટનાના ઝીણાં દીવડા છે માતબર.

પ્રભાવિત બુદબુદા કરશે, જરા ચેતી જજો,
અહી પાંખો વગરની વાયકા છે માતબર.

ફરી ઊભા થવાની હામ એ આપ્યા કરે,
મને મારામાં છે એ આસ્થા છે માતબર.

નવી દૃષ્ટિ, નવી દિશા જડે એવું બને,
અચાનક આવનારી આપદા છે માતબર.

પ્રશંસા, વાહવાહી, દાદ પણ પાણી ભરે,
શબદની, મૌનની સોળે કળા છે માતબર.

ઘણું ભૂલાવશે, સંભારશે, સ્વીકારશે,
સ્મરણ છે ને સ્મરણની ઊર્જા છે માતબર.

– લક્ષ્મી ડોબરિયા