નથી વિક્રમ, ઊડીને બેસશે વેતાળ કોના પર?
અને એ વારતાનો મૂકશે રસથાળ કોના પર?

ન લઈએ તો મળે છે પત્ર મોકલનારને પાછો,
ન લઉં હું તો તમે દીધેલ જાશે ગાળ કોના પર?

અરે દુર્ભાગ્ય! તારો પાડ માનું એટલો ઓછો!
તું જો ના હોત, નિષ્ફળતાનું ઢોળત આળ કોના પર?

મને વરસાદનું ના આપ આશ્વાસન ઓ ચોમાસા!
હું તો જાણું જ છું પડવાનો છે દુષ્કાળ કોના પર

તણખલા ઘાસના ઝઘડી પડ્યા છે અંદરોઅંદર,
ફકત એક વાત ઉપર કે ઝૂકી છે ડાળ કોના પર!

મળ્યા છે બે જણા એવા મુકામે એવી હાલતમાં,
નથી સમજાતું ઢોળાશે કયો ભૂતકાળ કોના પર!

~ અનિલ ચાવડા