ન ભાવતાં ને તમે ખાસ નભાવો
સુતેલાં ઓરતાં હવે તો જગાવો

આ કાળક્રમમાં છેવટ મળ્યું શું?
જાતે જ તેનો હિસાબ કરાવો

કૌરવ વસ્યો છે અંદર મનમાં જ
કૃષ્ણ પાસે એનો તોડ કરાવો

લોહી પીવે છે જગ એકબીજાનું
તમેય મોઢે એ સ્વાદ ભવડાવો

કૈંક તો નશો હશે ભક્તિ, સેવામાં
તમેય એકાદો એ જામ લગાઓ

હસતાં મોંઢાને કહી જ દો ‘સ્ટેચ્યૂ’
જાતને જાતથી જાતે મૂર્ખ બનાવો

એ છે શ્રેષ્ઠ રસ્તો પ્રસિદ્ધ થવાનો
પોતે જ પોતાને બદનામ કરાવો

ખુલ્લી જગ્યા પર થાય છે દબાણ
અંતરનાં ઘા ગમે તેને ના બતાવો

જગ સ્વીકારે નહીં આચરણ વિના
પહેલાં તમે સમજી પછી સમજાવો

~ મિત્તલ ખેતાણી