હાલ ભલે ને પસ્તી ગણાઉં,પણ કિતાબમાં જીવવું છે

ના સવાલમાં જીવવું છે કે ના જવાબમાં જીવવું છે
કરવું છે બ્રહાંડકલ્યાણ,બસ આ ખ્વાબમાં જીવવું છે

ન જ થાય ને જો અવતારકર્મ પૂર્ણ કરુણા,અહિંસાથી
ભગતસિંગનાં સ્વનાશી એવાં ઇન્કલાબમાં જીવવું છે

ચોપડી હશે ને જો તો જ ઉતરશે કો’ક કાળે ખોપડીમાં
હાલ ભલે ને પસ્તી ગણાઉં,પણ કિતાબમાં જીવવું છે

ઓગાળી દઇ ઓળખ બાજરી,ઘી,અજમો ને ગોળની
એકને પદ નહીં,સમૂહને પ્રદાન દેતી રાબમાં જીવવું છે

જો તેથી ય થાય દુર્જનનાશ કેરું રામાયણ,મહાભારત
નિમિત્ત થતા શકુની કે મંથરા સમ ખરાબમાં જીવવું છે

– મિત્તલ ખેતાણી