આભે ચડયો ઉન્માદને વરસી પડ્યો વરસાદ થૈ
ભીંજવતી યાદોમાં તું ટપકી પડયો વરસાદ થૈ

યાદોની ચમકી વીજળી ને ઝળહળી ગઇ રાત કૈ
ફરિયાદનાં ફોરામાં જો ઝઘડી પડયો વરસાદ થૈ

શ્રાવણ ને ભાદરવાનું ભારણ, ભારે બે માસનું ભૈ
હૈયે નિતરતો સ્નેહ પણ ચટકી પડયો વરસાદ થૈ

તપતી ઘરા, કેવી ખબરને વરાળ જોડે મોકલી!
આવી પલક ઝબકારે એ વળગી પડયો વરસાદ થૈ

વિજળી ને છંછેડી છે તાન મહી બહુ આવી જઈને
ભયભીત થઇ ધરતી ઉપર સરકી પડયો વરસાદ થૈ

લીલી એ ચોમાસાની વાતો આકરી લાગે ઘણી
મને લીલ જેવું જકડતો લપસી પડયો વરસાદ થૈ

બાકી રહી છે તરસ મારી આટલાં વરસાદ માં
એ દેશની મીટ્ટી મહી લપટી પડયો વરસાદ થૈ

~ રેખા પટેલ ‘વિનોદિની’