એમ તો દરરોજ દેખાયા અમે,
શે’ર, ગઝલોથી જ સમજાયા અમે.

સૂર થઇ મહેલોમાં પડઘાયા અમે,
પણ સમજદારોને શંભળાયા અમે.

એ ખબર છે પ્રેમમાં બળતા રહી,
કેટલા દર્દોથી ઢોળાયા અમે ?

મૂંછવાળા દુશ્મનો ભાગી ગયા ,
દાઢીવાળા દોસ્ત પકડાયા અમે.

એક ઘટનામાં બિલાડીના ગળે,
બાંધવાને ઘંટ રોકાયા અમે.

મિત્રતા ફૂલોની કરતાં શું થયું?
કંટકોમાં પણ સુગંધાયા અમે.

હોળીનું શ્રીફળ બનીને ‘ દોસ્તો’,
કેટલી જગ્યા વધેરાયા અમે.

~ સિદ્દીક ભરૂચી