તમે જે કહો તેમ જ મારે કહેવાં કરવાનું હોય તો કહેતાં નહીં

તમે જે કહો તેમ જ મારે કહેવાં કરવાનું હોય તો કહેતાં નહીં
માયા માટે તમે જે સહી શકો ને તે મને સહેવાનું કહેતાં નહીં

તમને જ મુબારક વૈચારિક ને આચારિક નગરવધુત્વ તમારું
મારાં સતીવ્રતત્વને નજદીકથી અડતાં કે પછી આભડતાં નહીં

અકબંધ જ રહેવાં દેજો વિસ્મય,કૌતુક,સ્વપ્ન ને શ્રધ્ધા મારી
તમારી વહેવારિક સમજથી મારાં આધ્યાત્મને તગેડતાં નહીં

ફરવાં જાઓ તમે કે રમો બરફની ક્ષણિક મસ્તીથી એ ઠીક
હિમાળો ગાળવાનાં બાજુનાં માર્ગે ભૂલેચૂકેય નીકળતાં નહીં

જો પડ્યાં જ રહેવું હોય માયાનાં રાણીવાસે તન,મન,ધનથી
સર્વશ્રેષ્ઠ ભોગ એવાં ત્યાગનાં માર્ગે તો પછી નીકળતાં નહીં

– મિત્તલ ખેતાણી
(મિત્તલ ખેતાણી નાં કાવ્ય સંગ્રહ ‘स्वान्तः सुखाय’માં)