આત્મા સીવાય કોઈને પૂછવાનું નહીં ફાવે

આત્મા સીવાય કોઈને પૂછવાનું નહીં ફાવે
પગલૂંછણીયે આ જાત મૂકવાનું નહીં ફાવે

ભલે ને હોય આ જન્મે ભાગ્ય નબળું તો ય
લેશું જન્મ બીજો, કોઈને ઝુકવાનું નહીં ફાવે

લડીશ સામી છાતીએ કુરુક્ષેત્ર ને લંકાએ
મંથરાવૃત્તિથી કોઈના કાન ફૂંકવાનું નહીં ફાવે

કર્ણ જેમ ઋણ ફેડીશ ,સામે હશે ઈશ તો ય
જે થાળીમાં ખાધું ત્યાં છેદવાનું નહીં ફાવે

કળિયુગે કર્મ,પરહિત ને નામ રામ નું ઘણું
ગીતા-રામાયણ-પુરાણ ગોખવાનું નહીં ફાવે

વંશજ છું તુલસી,કબીર,નરસિંહ ને મીરા નો
કલમ વેચી ને ચાંપલુસી કરવાંનું નહીં ફાવે

– મિત્તલ ખેતાણી