તુલસીથી જ તોળાય એવી કિંમત રાખજો

દિન દુઃખી ને અબોલ પ્રત્યે નિસ્બત રાખજો
સૌને મદદરુપ થવાની સર્વદા નિયત રાખજો

બ્રહ્માડનો જગભોગ પણ જે ન ખરીદી ન શકે
તુલસીથી જ તોળાય એવી કિંમત રાખજો

કૉક દિ આવવું પડશે એંઠા બોર ખાવા એણે
હૈયે હામ,હૂંફ,હેત,હોંકારો ને હિંમત રાખજો

હું છું,તું છે,સપનાઓ છે આ બે ચાર ઘણું છે!
કળિયુગની કાળરાતે આશા જીવંત રાખજો

કહો હાથી ને હાથી જ મહાભારત મધ્યે પણ
યુદ્ધ ભલે હારી જવાય શબ્દમાં સત રાખજો

– મિત્તલ ખેતાણી
(મિત્તલ ખેતાણી નાં કાવ્ય સંગ્રહ ‘स्वान्तः सुखाय’માં)