ગઝલ…થઇ જાયે

કાશ આ જૂઠ સત્ય થઇ જાયે,
જે નથી એ જ શક્ય થઇ જાયે.

ભૂલવા ચાહો ને ભૂલાય નહિં,
એવી એક ક્ષણ અશક્ય થઇ જાયે.

કલમ-પીંછી,વિચાર – શબ્દો-રંગ,
લાવો કાગળ પર દ્રષ્ય થઇ જાયે.

જૂઠ બોલો તો , ચોતરફ આનંદ,
સત્ય બોલો “રહસ્ય” થઇ જાયે.

જેને ચાહું ને એ મળે તુર્ત જ,
લાગણી ધન્ય ધન્ય થઇ જાયે.

મારા શે’રોમાં એટલો શક છે,
સાંભળે એનું લક્ષ્ય થઇ જાયે.

“ઝૂંપડીનું” મળસ્કું સ્વપ્ન જુએ,
મહેલ અહિંયા જ ભવ્ય થઇ જાયે.

તારી એક હાજરીથી ઓ” સિદ્દીક”,
કંઇ ઉદાસી અદ્રષ્ય થઇ જાયે.

– સિદ્દીક ભરૂચી | Siddiq Bharuchi

માર્ચ 2022ના “સાંજ” ઈમેગેઝિનમાં અપ્રગટ ગઝલ મંગાવી માનપૂર્વક સ્થાન આપવા બદલ તંત્રીશ્રી તલાટી કોમલબેનનો તથા સમગ્ર ટીમનો ખૂબ ખૂબ આભારી છું,