મોટાં થઈને ય મોટાં રહેવું સહેલું નથી

પહેલું હોય ને તે દર વખતે પહેલું નથી
મોટાં થઈને ય મોટાં રહેવું સહેલું નથી

માન્યું ખોટાંને ખોટું કહેવું અઘરું જ છે
સત્યને પણ સત્ય બધાંએ કહેલું નથી

મૃત્યુ પછી જ તો યાદ આવે છે ને ગંગા
શુધ્ધ થવા જીવન કદી ગંગામાં વહેલું નથી

‘કરીએ એટલું થાય’ માનનારથી જ થાય
‘થાય એટલું કરીએ’વાળાએ કૈ કરેલું નથી

એમ થાત તો થાત નગ્ન તો અસ્તિત્વ જ ને
તેથી જ તો ચીરહરણમાંય ચીર સરેલું નથી

– મિત્તલ ખેતાણી