Geet Gujarati

બોલ હવે અનિલ્યા!

એક સવારે મેં પાંપણ પર ઝાકળબિંદુ ઝીલ્યાં,
સવાર બોલી, ‘કેવું લાગ્યું બોલ હવે અનિલ્યા!’

લઈ ખભા પર રાત આખી આ તારલિયાનો ખેસ,
રાત વાટતી રહી અંધારું અને બનાવી મેશ;
જરાક અમથી મેશ લઈ મેં આંખોમાં આંજી લ્યા!

સવાર બોલી, ‘કેવું લાગ્યું બોલ હવે અનિલ્યા!’
સૂરજ! તેં તો ન્હાવા માટે અજબ કર્યો છે નુસખો,
જળને સ્હેજ હલાવા વિણ તડકાથી માર્યો ભૂસકો;
મારી અંદર હલ્યાં સરોવર, કમળ અચાનક ખીલ્યાં,

સવાર બોલી, ‘કેવું લાગ્યું બોલ હવે અનિલ્યા!’

– અનિલ ચાવડા

Leave a Reply

This site uses Akismet to reduce spam. Learn how your comment data is processed.