Gazal Gujarati

આભે ચડયો ઉન્માદ

આભે ચડયો ઉન્માદને વરસી પડ્યો વરસાદ થૈ
ભીંજવતી યાદોમાં તું ટપકી પડયો વરસાદ થૈ

યાદોની ચમકી વીજળી ને ઝળહળી ગઇ રાત પણ
ફરિયાદનાં ફોરામાં તું ઝઘડી પડયો વરસાદ થૈ

શ્રાવણ ને ભાદરવાનું ભારણ તો છે બારેમાસનું
હૈયા નિતરતા સ્નેહથી લપકી પડયો વરસાદ થૈ

ડુસકાઓ ભરતા વાદળૉ સાથે તરસ પણ ગાય છે
રિમઝિમ સૂરે ધરતી ઉપર સરકી પડયો વરસાદ થૈ

લીલી એ ચોમાસાની વાતો આકરી લાગે મુજને
ને લીલની જેવો મને વળગી પડ્યો વરસાદ થૈ

મારા સજનના દેશમાં મારી ખબર દઈ આવજે
પરદેશમાં વિરહે ઘણો લપટી પડયો વરસાદ થૈ

~ રેખા પટેલ ‘વિનોદિની’

Leave a Reply

This site uses Akismet to reduce spam. Learn how your comment data is processed.