Gazal Gujarati

એકલતાને મ્હાત કરી

એકલતાને મ્હાત કરી.
કાગળમાં રજૂઆત કરી.

ઓસ ઘડીભર જીવી લે,
ઝળહળ ઝીણી ભાત કરી.

તથ્ય બતાવ્યું ભ્રમણાંનું,
રેતી પર જળઘાત કરી.

ઓળખ મારી આપું છું,
જાત ને પારિજાત કરી.

કૂંપળના સધિયારાએ,
ડાળીને રળિયાત કરી.

આંખવટો સપનાને દઇ,
હાથવગી નિરાંત કરી.

હૈયું ખોલી, ખાળ્યું મન,
ગઝલોમાં મેં વાત કરી.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.