Gujarati

ભીનપવર્ણી તરસનો પડઘો

ભીનપવર્ણી તરસનો પડઘો દશ દિશે પડઘાતો,
સખી, આષાઢ નથી સહેવાતો

અનરાધારનો ડોળ કરીને વરસ્યો ધીમી ધારે,
કેમ કરી ઉચકાય સખી, આ ગોરંભો છે ભારે,
મોરપીચ્છી સંદેશા લાવી વાયરો ય હરખાતો,

સખી, અષાઢ નથી સહેવાતો.

ચૈતરને મેં ગુલમહોરી શીળો થપ્પો દીધો,
જેઠ તણા ઉકળાટને કાગળ ઉપર ઠારી લીધો,
લાખ ઉપાયે છૂટયો નહિ આ મેઘધનુષી નાતો,

સખી, આષાઢ નથી સહેવાતો.

રંગે-રૂપે નોખાં ટાણાં સંભાળ્યા છે સ્હેજે,
વાત જરીક છે લાંબી સખી, પણ તું હોંકારો દેજે,
ગમતિલા સંગાથ વગરનો વલોપાત વળખાતો,

સખી, આષાઢ નથી સહેવાતો.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.