Mittal-khetani-poetry-gazals-gujarati litrature
Gujarati

હવે તો પાછો આવી  જા

હવે તો પાછો આવી જાને કાન્હા
વાદો તારો નિભાવી જાને કાન્હા

તે કીધું તું કે જન્મીશ હું યુગે યુગે
સજ્જનો ને બચાવી જાને કાન્હા

ગાયો રખડે રસ્તે ને કપાય છે પણ
ગોવાળધર્મ બજાવી જાને કાન્હા

સ્ટ્રેસનાં ગોવર્ધનો નીચે દબાયાં સૌ
ટચલી આંગળી ઉઠાવી જાને કાન્હા

સુદામા અટવાયો છે અધિકારીરાજે
દ્વારે આવીને બોલાવી જાને કાન્હા

વાંસળી સૂર થયોછે બહેરો કળિયુગે
સુદર્શન હવે ચલાવી જાને કાન્હા

દ્રૌપદી તો શું બાળકીઓ લૂંટાય છે
અખૂટ ચીર તું પૂરાવી જાને કાન્હા

પાંડવોને ખપે હવે માત્ર અક્ષોહીણી
મહત્ત્વ તારું સમજાવી જાને કાન્હા

તારાં ભક્તો લડે છે તારાં જ નામે
યાદવાસ્થળી અટકાવી જાને કાન્હા

સટ્ટો ને કુસંગ તો છે અધોગતિનું મૂળ
યુધિષ્ઠિરને સત્ય બતાવી જાને કાન્હા

વિભીષણ જેમ કર્ણ ય કરે પક્ષપલટો
સતાનું ગણિત સમજાવી જાને કાન્હા

ચોરી તો દિલ કે માખણની જ હોય ને
કામચોરોને ય આ ઠસાવી જાને કાન્હા

સત્ય, પ્રેમ, કરુણાનાં પાઠ ભણાવીને
ભારત વિશ્વગુરુ બનાવી જાને કાન્હા

~ મિત્તલ ખેતાણી

Leave a Reply

This site uses Akismet to reduce spam. Learn how your comment data is processed.