Siddiq-Bharuchi-poetry-gazals-gujarati litrature
Gujarati

મરસિયામાં ગઝલ લખવું પડે

મરસિયામાં ગઝલ લખવું પડે છે,
કદી કંટકમાં જઇ વસવું પડે છે.

હરખમાં પણ કદી રડવું પડે છે,
ન કરવાનું છતાં કરવું પડે છે.

પ્રથમ રસ્તા,પછી કદમોને ધોયા,
સિયાસતમાં જરા નમવું પડે છે.

અમે જીવ્યા સુધી તો છાંય આપી,
સુકાયા તો હવે બળવું પડે છે.

હવાઓ રૂપ રંગ બદલે છે ક્યારે?
નવી પેઢીમાં આ, કળવું પડે છે.

કદી દુશ્મનને રાજી રાખવાને,
કદી મસ્તક કલમ કરવું પડે છે.

~ સિદ્દીક ભરૂચી

Leave a Reply

This site uses Akismet to reduce spam. Learn how your comment data is processed.