Siddiq-Bharuchi-poetry-gazals-gujarati litrature
Gujarati

ફૂલડાં સૌ, હારમાં નહિ

ફૂલડાં સૌ, હારમાં નહિ આવશે,
જો… સુગંધો પ્યારમાં નહિ આવશે.

પક્ષીઓ લોભાવતા નહિ આવડે,
કાલ એ સરકારમાં નહિ આવશે.

નાટકો પડદાની પાછળ થાય છે,
એ ખબર અખબારમાં નહિ આવશે.

આઈના તૂટી જશે પણ, દોસ્તો-
પ્રશ્ન કો’ તકરારમાં નહિ આવશે.

પ્યારની ભાષા તો બાકી નહિ રહે,
સત્ય પણ વ્યવહારમાં નહિ આવશે.

લાગણી ઝરણા સમી વ્હેતી મળે,
કોઈ પણ આકારમાં નહિ આવશે.

ઈશ્ક , શ્રદ્ધા, માણસાઈ, દોસ્તી,
સજ્જનો તહેવારમાં નહિ આવશે.

કોણ કહે છે , મચ્છરોના લશ્કરો,
આપણા વિસ્તારમાં નહિ આવશે!!

~ સિદ્દીક ભરૂચી

Leave a Reply

This site uses Akismet to reduce spam. Learn how your comment data is processed.