Gujarati

ભૂલ એમાં મારી છે ને

ભૂલ એમાં મારી છે ને એટલે હું ચૂપ છું,
વાત એમાં તારી છે ને એટલે હું ચૂપ છું.

આમ તો નારાજ છું હું સાચ્ચે તારાથી ઘણી,
આપણી આ યારી છે ને એટલે હું ચૂપ છું.

કોઇનુ પણ દુ:ખ જરાયે તું તો જોઈ ના શકે,
ટેવ તારી સારી છે ને એટલે હું ચૂપ છું.

તું સતત મારા વિશે ખોટું જ વિચારે છતાં,
તું મને બહુ પ્યારી છે ને એટલે હું ચૂપ છું.

આ દિવાલો ક્યાં નડે છે આપણા સંબંધમાં,
ખુલ્લી ઘરની બારી છે ને એટલે હું ચૂપ છું.

– અંજના ગોસ્વામી ‘અંજુમ આનંદ’

Leave a Reply

This site uses Akismet to reduce spam. Learn how your comment data is processed.