Gujarati

થોડી ધીરજ ધરજે. . .

થોડી ધીરજ ધરજે. . .
કાગળ. . . થોડી ધીરજ ધરજે.
શક્યતા સો ટચની છે કે કોઇ તને પણ સમજે. . . .

કાગળ થોડી ધીરજ ધરજે.

પોત સફેદી તારું જોઈ હાથ ને હૈયું રીઝે,
તારી ઓથે વેળા સઘળી સાવ સહજ થઇ સીઝે,
હળવી હો કે ભારી હો પણ ક્ષણને સાર્થક કરજે. . .

કાગળ થોડી ધીરજ ધરજે. .

ભીતર નો રવ ઝીલવાને તું રાત-વરત પણ જાગે,
વાત વિસામા કાજે તારો હાથ બધા યે માંગે,
ભાવતણી ભરતીની જેમ જ ઓટ બધી તું ખમજે. . .

કાગળ થોડી ધીરજ ધરજે. .

સારી-નરસી ઘટના ટાણે તાજના સાક્ષી થાવું,
પીડાનો સંદેશ ગ્રહીને ગીત મજાનું ગાવું,
સહદેવી આ પીડા અંતે તારું હોવું સરજે. . .

કાગળ થોડી ધીરજ ધરજે. .

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.