Gazal Gujarati Poet's Corner

સમયને હાથ જોડ્યા તોય

સમયને હાથ જોડ્યા તોય, પાછો ક્યાં વળે છે… જો.
અને, માંગ્યા વગર પીડા બધી આવી મળે છે… જો.

કદી વાસંતી સપનાં આંખમાં રોપ્યા હતાં એથી ,
હવે તો પાનખર પણ, થઈ ગુલાબી ને ફળે છે… જો.

હથેળી બંધ છે ને, કાલ પણ એમાં સલામત છે ,
છતાંયે બીક રાખી, આજ કેવી સળવળે છે… જો.

છલોછલ બારમાસી લાગણી કેરા સરોવરમાં ,
અધૂરી ઝંખના, ટોળે વળીને ટળવળે છે… જો.

સમય, સંજોગને ગ્રહોતણાં. માંડીને વરતારા ,
તું મનગમતી કરીને વાત, ખુદને પણ છળે છે… જો.

~ લક્ષ્મી ડોબરિયા

Advertisements

Leave a Reply

This site uses Akismet to reduce spam. Learn how your comment data is processed.