Gazal Gujarati Poet's Corner

ખોટું-ખરું કરીને, ધાર્યું કરી જવાનો

ખોટું-ખરું કરીને, ધાર્યું કરી જવાનો !
આ તો સમય છે અંતે, થાળે પડી જવાનો !

વિસ્તાર ડાળખીનો, કરવો હતો ને એથી,
શીખ્યા છે પાંદડાઓ, નુસખો ખરી જવાનો !

સંજોગ. . તું અડીખમ, થઈને ભલે ને આવે,
મેં તો ઈરાદો રાખ્યો, ઝરણું થઈ જવાનો !

પગભર થઈ જવાયું, આ સત્ય જાણવાથી,
પડછાયો પણ તમસમાં, સાથે નથી જવાનો !

હૈયામાં હામ રાખી, ચૈતરનો રાગ સૂણ્યો,
એના પ્રભાવે દરિયો, વાદળ બની જવાનો !

તારો તું મોહ છોડી, ને ચાલ તારી સાથે,
હળવાશનો ઈજારો, સ્હેજે મળી જવાનો !

તું ‘ હાથ ખાલી છે ‘ નો, અફસોસ કાં કરે છે ?
ચાહતને આપ મોકો, હૈયું ભરી જવાનો !

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.