Gazal Gujarati Poet's Corner

એક જણની સામે

એક જણની સામે, સાચા થઈ જુઓ !
ને, અરીસા તોડી, હળવા થઈ જુઓ !

સ્થિરતા સંબંધમાં આવી જશે,
બસ, સમયસર વત્તા-ઓછા થઈ જુઓ !

નહિં રહે અફસોસ પીળા પાનનો,
ક્યાંક કુંપળ, ક્યાંક ટહુકા થઈ જુઓ !

ભીતરી અસબાબને પામી શકો,
માર્ગ ભુલેલાના નક્શા થઈ જુઓ !

થઈ જશે પળવારમાં એ ઠાવકું,
મન ગળ્યું માંગે તો, કડવા થઈ જુઓ !

સાવ સીધા લાગશે રસ્તા બધા,
હા, નદીની જેમ વહેતા થઈ જુઓ !

સૂર્યનો મહિમા જ કરવો હોય તો. .
રાત ટાણે સ્થિર દીવા થઈ જુઓ !

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.