Gazal Gujarati Poet's Corner

આમ ભરચક, આમ ખાલી

આમ ભરચક, આમ ખાલી
મન તો છે જાદૂઈ પ્યાલી !

એ હતી નવજાત તો યે,
વાત આખી રાત ચાલી !

છે સવાલો સાવ નક્કર,
પણ જવાબો છે ખયાલી !

ઘાસની લીલી સભા પર,
શ્વેત ઝાકળની છે લાલી !

કેફિયત મારી સૂણી ને,
આ ગઝલ પણ ફૂલી-ફાલી !

સાત પગલાં મેં ભર્યા છે,
ખુદ્દની દુઃખતી રગને ઝાલી !

તું ગણિત એવું ગણે કે –
મુઠ્ઠી મુદ્દલ, વ્યાજ પાલી !

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.