Gazal Gujarati Poet's Corner

આમ તો એ રાત

આમ તો એ રાત ફળદાયી હતી.
જે પ્રતીક્ષારત ને વરણાગી હતી.

જ્યોત ઝીણી જીવ પર આવી હતી,
ઊંઘતી સૌ રાત ઝડપાઈ હતી.

રાત અંગે એટલે નિશ્ચિંત છું,
દિનચર્યા મેં ધ્યાનમાં રાખી હતી.

એ તરફદારી કરે નહિ કોઈની,
રાતમાં એવી સમજદારી હતી.

રાત છે પણ ચાંદ ને તારા ય છે,
આટલી સમજણની સરવાણી હતી.

તથ્ય પડછાયાનું જોઈ, જાણીને,
કેમ કહેવું, રાત અંધારી હતી ?

રાતનું કામણ કરી ગ્યું કામ તો
ચંદ્રએ સોળે કળા વારી હતી.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.