Gazal Gujarati Poet's Corner

તર્ક ને વિતર્ક જરા વાર

આ તર્ક ને વિતર્ક જરા વાર હોય છે.
ને મૌન નો પ્રભાવ લગાતાર હોય છે.

ઉત્તર બધાય એના વજનદાર હોય છે.
ખાલીપો એ રીતે તો અસરદાર હોય છે.

બસ, આપણાં જ આંખ અને કાન બંધ છે,
બાકી તો આપણાંમાં અમલદાર હોય છે.

તું કોણ છે ? નો પ્રશ્ર્ન અરીસો તને પૂછે,
જાગી જવાની ક્ષણનો એ અણસાર હોય છે.

મોભો પહાડનો ય વધી જાય છે જુઓ,
ઝરણાંની ચાલ એવી લચકદાર હોય છે.

ઠંડક ગણો કે હૂંફ, સમયસર એ આપશે,
ઘરના બધા જ ખૂણા સમજદાર હોય છે.

આ રોજ ની કસોટી એ સાબિત કર્યું સમય,
થોડો -ઘણો તો તું ય તરફદાર હોય છે.

~ લક્ષ્મી ડોબરિયા

Advertisements

Leave a Reply

This site uses Akismet to reduce spam. Learn how your comment data is processed.