Geet Gujarati Poet's Corner

કેમ કરું ફરિયાદ. . .

કેમ કરું ફરિયાદ. . . ? હરિ હું કેમ કરું ફરિયાદ. . ?
હાથ જરી લંબાવું ત્યાં તું, સાધી લે સંવાદ. . . !

પછી હું કેમ કરું ફરિયાદ. . ?

વાત અભાવની માંડી ત્યાં, એક ઝાડ વહારે આવ્યું
ખીલવું-ખરવું હોય સહજ એ, તથ્ય મને સમજાવ્યું !
આષાઢી વ્હાલપથી ઠરતા, વૈશાખી વિષાદ. . .

પછી હું કેમ કરું ફરિયાદ. . . ?

શગ પીડાની સંકોરીને, અજવાળું વિસ્તાર્યું,
ઘાટ ઘડે છે એ ઘટનામાં, તારું હોવું ધાર્યું,
સાદ કરું છું જ્યારે જ્યારે, આપે છે તું દાદ. . .

પછી હું કેમ કરું ફરિયાદ. . ?

સાંજ-સવારી વેળના રંગો, એક સરીખા ભાળી,
સમતાના બી વાવીને મેં, ઓટ સમયની ખાળી,
હોવું મારું આમ નિખાર્યું, હું ને રાખી બાદ. . .

પછી હું કેમ કરું ફરિયાદ. . . ?

~ લક્ષ્મી ડોબરિયા

Advertisements

Leave a Reply

This site uses Akismet to reduce spam. Learn how your comment data is processed.