Gujarati Poet's Corner

શ્રી કૃષ્ણ હરે : અકલ્પિત

શ્રી કૃષ્ણ હરે

છંદ જાત :- તોટક

કર ચક્ર ધરે કર પદ્મ ધરે,
મુખ સ્મિત અને સુર વેણુ ધરે,
કુળ યાદવ છે થઈ ગ્વાલ ફરે,
શિર પંખ મયૂર શ્રી કૃષ્ણ હરે

||૧||

પજવે ફરતી સહુ ગ્વાલણને,
મટકી ભરતી લઈ માખણને,
પથરો મટકી પર ઘાત કરે,
મમ માખણચોર શ્રી કૃષ્ણ હરે

||૨||

યમુના તટ કાલિયને લડતાં,
કદી સંગ સખા રમતાં પડતાં,
વન ગોપ સખી સહ રાસ કરે,
રુપ એક અનેક શ્રી કૃષ્ણ હરે

||૩||

ગમને બલરામ સહી મથુરા,
જઈ કંસ હણે રણ ધર્મધુરા,
કદી બૌદ્ધ બની ઉપદેશ કરે,
સચરાચર નામ શ્રી કૃષ્ણ હરે

||૪||

રગમાં રજમાં જગમાં ઘટમાં,
વસતાં ભગવાન શિશું હઠમાં,
કદી કીટક તો રુપ વ્રાહ ધરે,
પરમો પરબ્રહ્મ શ્રી કૃષ્ણ હરે

||૫||

~ ભાવિન દેસાઈ ‘અકલ્પિત’

Leave a Reply

This site uses Akismet to reduce spam. Learn how your comment data is processed.