Gazal Gujarati

ભીતરેથી રોજ માંજે છે મને

ભીતરેથી રોજ માંજે છે મને
પ્રશ્ન જાણે ઝળહળાવે છે મને

એમ લાગે કે સતાવે છે મને
પણ, સમય તથ્યો બતાવે છે મને

કાલે જે બંધન સમી લાગી હતી
આજે એ રેખા ઉગારે છે મને

એટલે રાખું છું થોડી શૂન્યતા
કાન ફૂંકી એ જગાડે છે મને

ઝાંઝવા જોઉં છું કે માંડી પરબ
તું તરસ આપી તરાશે છે મને

હસ્તરેખાઓ ગઈ છે વિસ્તરી
જિંદગી બસ, એમ રાખે છે મને

આ ગઝલ અજવાળું થઈ ને અવતરી
એ ઋણાનુબંધ લાગે છે મને

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.